Агаарын температурын арав хоногийн дундаж Хангай, Хэнтэй, Хөвсгөлийн уулархаг нутаг, Хархираа, Түргэний уулсаар 5,0-14,5 градус, Алтайн уулархаг нутаг, Тарвагатай, Булнай, Хантайшир, Хан Хөхий нуруугаар 0,0-4,9 градус хүйтэн,  Их Нууруудын хотгор, Баруун хуурайн хоолой, Алтайн Өвөр, Заг Сүүж, Галба, Өөшийн говь, Улаан нуурын хөндийгөөр 5,1-12,1 градус, бусад нутгаар 0,1-5,0 градус дулаан (1 дүгээр зураг) буюу олон жилийн дундажтай харьцуулбал баруун аймгуудын нутгаар 1,1-3,7 градусаар дулаан, зүүн болон говийн аймгуудын ихэнх төвийн аймгуудын зарим нутгаар 1,1-2,6 градусаар хүйтэн, бусад нутгаар дунджийн орчим байлаа.

            Агаарын температур өдөртөө ихэнх нутгаар 8-15 градус, тал хээр, говийн нутгаар 16-22 градус дулаан, шөнөдөө Алтайн Өвөр говиор 4 градус дулаан, уулархаг нутгаар 11-20 градус, бусад нутгаар 0-9 градус хүйтэн байлаа.

            Хөрсний гадарга дээр температур өдөртөө ихэнх нутгаар 20-29 градус, Дархадын хотгор орчмоор 14-19 градус, говийн нутгаар 30-38 градус дулаан, шөнөдөө уулархаг нутгаар 11-22 градус, говийн нутгаар 3-10 градус хүйтэн байлаа.

            Энэ арав хоногт ихэнх нутгаар 0,0-5,0 мм, Завханы Яруу, Говь-Алтай Есөнбулаг, Хөвсгөлийн Тариалан, Их-Уул, Алаг-Эрдэнэ, Өвөрхангайн Есөнзүйл, Өлзийт, Бат-Өлзий, Булганы Рашаант, Дорнодын Хэрлэн, Халхгол, Хэнтийн Өмнөдэлгэр, Батширээт, Дундговийн Дэрэн 5,1-10,0 мм, Хөвсгөлийн Эрдэнэбулган, Цагаан-Үүр 10,1-13,8 мм орсон. Харин  баруун болон говийн аймгуудын нутгаар хур тунадас ороогүй. (2 дугаар зураг) Олон жилийн дундажтай харьцуулбал 80 орчим хувьд дунджаас бага,  20 гаруй хувьд дунджийн орчим буюу түүнээс ахиу хур тунадас орсон байна.

            Cалхины их хурд ихэнх нутгаар 16-27 м/с буюу  аюултай үзэгдлийн хэмжээнд, Говь-Алтайн Бугат, Баянхонгорын Богд, Өвөрхангайн Баян-Өндөр, Өмнөговийн Цогт-Овоо сумдын нутгаар 28-31 м/с буюу онц аюултай үзэгдлийн хэмжээнд хүрч салхилсан байна.

            Цаг агаарын нөхцлийн онцлог

• Энэ арав хоногийн мэдээгээр Завхан, Хөвсгөл, Архангай зарим нутгаар 0-10 см цастай байна.