Агаарын температурын арав хоногийн дундаж Хөвсгөлийн уулархаг нутаг, Хангайн өндөрлөг уулс, Хан Хөхийн нуруу, Хархираа Түргэний уулс, Увс нуур, Дархадын хотгороор 30-45,2 градус, Алтай, Хангай, Хэнтэйн уулархаг нутаг, Их Нууруудын хотгор, Орхон Сэлэнгийн хөндийгөөр 20,0-29,9 градус, говийн нутгаар 6,0-14,9 градус, бусад нутгаар 15,0-19,9 градус хүйтэн (1 дүгээр зураг) буюу ихэнх нутгаар олон жилийн дунджийн орчим буюу түүнээс 1,1-6,9 градусаар дулаан, Алтай уулархаг нутаг, Хан Хөхий, Булнайн нуруу, Их Нууруудын хотгороор 1,1-5,3 градусаар хүйтэн байлаа.

Агаарын температур өдөртөө Хөвсгөлийн уулархаг нутаг, Увс нуур, Дархадын хотгороор 20-30 градус, тал хээр говийн нутгаар 3 градус дулаанаас 10 градус хүйтэн, бусад нутгаар 10-19 градус хүйтэн,  шөнөдөө ихэнх нутагт 31-40 градус, Хангай, Хөвсгөлийн өндөрлөг уулс, Хан Хөхийн нуруу, Увс нуур, Дархадын хотгороор 40-44 градус, говийн нутгаар 18-29 градус, бусад нутгаар 30-39 градус хүйтэн байлаа.

Хөрсний гадарга дээр өдөртөө ихэнх нутгаар 1-10 градус,  Увс нуур болон Дархадын хотгороор 21-26 градус, Алтай, Хангай Хөвсгөлийн уулархаг нутаг, Хан Хөхийн нуруугаар 11-20 градус хүйтэн, говийн нутгаар 0-12 градус дулаан, шөнөдөө ихэнх нутгаар 30-39 градус, Алтай, Хангайн уулархаг нутгаар 40-46 градус, Монголын Дорнод тал болон говийн нутгаар 20-29 градус хүйтэн байлаа.

Энэ арав хоногт хур тунадас Баян-Өлгий, Ховд, Завхан, Сэлэнгэ, Дархан-Уул, Сүхбаатарын ихэнх, Увс, Дорнод, Төвийн зарим, Хөвсгөл, Архангай,  Өвөрхангай, Өмнөговийн зарим нэг сумдын нутгаар 0,0-1,4 мм орсон. Харин ихэнх нутгаар хур тунадас ороогүй (2 дугаар зураг) буюу олон жилийн дундажтай харьцуулбал нутгийн 90 орчим хувьд дунджаас бага, 10 орчим хувьд буюу Баян-Өлгий, Ховд, Увсын ихэнх нутгаар  дунджийн  орчим буюу түүнээс ахиу тунадас орсон байна.

Cалхины их хурд Говь-Алтайн Бугат, Баянхонгорын Богд, Баянцагаан, Өвөрхангайн Өлзийт, Хархорин, Төвийн Баян, Хэнтийн Галшар, Дархан, Дэлгэрхаан, Дорнодын Дашбалбар, Сүхбаатарын Асгат, Дундговийн Гурвансайхан, Өмнөговийн Булган сумдын нутгаар 16-21 м/с буюу аюултай үзэгдлийн хэмжээнд хүрч салхилсан байна.

1 дүгээр сарын 20-ны байдлаар нутгийн 40 орчим хувьд цасан бүрхүүл тогтоод байгаагаас Баян-Өлгий, Увс, Ховд, Завхан, Говь-Алтай, Сэлэнгийн ихэнх, Хөвсгөл, Баянхонгор, Орхон, Булган, Төв, Говьсүмбэр, Дорнодын зарим, Архангай, Өвөрхангайн ганц нэг сумдын нутгаар 0-5 см, Увсын Давст, Түргэн, Хяргас, Тэс, Завханы Цэцэн-Уул, Яруу, Тосонцэнгэл, Цагаанчулуут, Цагаанхайрхан, Баянхайрхан, Тэс, Хөвсгөлийн Арбулаг, Булганы Сэлэнгэ, Дашинчилэн, Тэшиг, Орхоны Жаргалант, Сэлэнгийн Орхон, Орхонтуул, Дархан-Уулын Дархан, Төвийн Цээл сумдын нутгаар 6-10 см, Баян-Өлгийн Алтай, Сагсай (Даян), Увсын Малчин, Баруунтуруун, Зүүнговь, Улаангом, Завханы Баянтэс, Улиастай, Хөвсгөлийн Алаг-Эрдэнэ (Хатгал), Улаан-Уул, Сэлэнгийн Ерөө (Бугант) зэрэг сумдын нутгаар 11-18 см зузаан, цасны нягт 0,10-0,27 гр/см3 байна. Бусад нутгаар цасгүй (3 дугаар зураг) байлаа.

Цаг агаарын нөхцлийн онцлог

• Энэ арав хоногт ихэнх нутгаар олон жилийн дунджаас дулаан байснаас цасан бүрхүүлийн хэмжээ ялимгүй буурсан байна.

• Мал аж ахуйн үйлдвэрлэлд малд нэмэгдэл тэжээл өгөх ажил хийгдэж байгаа мэдээтэй байна.